( مدرسة الحياة )
النهاردة
أول يوم اخطي المدرسة
عمري ستة من السنين
لسه محتاج للحنين
لسة بالعب في الحواري
ما احنا كنا صغيرين
أمي صحتني وقالت:
قوم حبيبي خلاص كبرت
إيه؟ كبرت؟
قوم وصلي الفجر حاضر... قلت حاضر
آه فرحت!
أصلي فكرت اني حاتعلم كلام
زي كل كبار حارتنا بالتمام
قلت فاضل يطلع لي شنب
ما هو أصل اسمي على الدفاتر انكتب
خطيت... جوه سور المدرسة وقلت اشوف
والدرس كان أول حروف:
ألف وباء - ألف وميم
واو وطاء ووراها نون
أب - أم - وطن حنون
كنت اردد كل كلمة انا وصحابي
كنت بارسم من كلامي حروف كتابي
كنت الملم في الحروف
علموني ان الوطن هو السكن
أب أم أخ بيت
والصحاب بيهم لاقيت
في الوطن عزة وأمان
عشرة فوق كل الزمان
كلها من غير تمن
علموني الدين عبادة مش سيادة
لو تصلي فرض ربك
لو يوحد بس قلبك
راح تعيش وبنفس راضية
راح تكون العيشة هادية
كلها فرحة وسعادة
علموني ان الشباب هو الأمل
هو أصل القوة فينا
هو أجمل شيء مالينا
هو أملي اللي انكتب
هو عمري اللي اتحسب
هو بكرة اللي اكتمل
وكبرت ... وطلع لي الشنب...
واكتشفت ساعتها نسيوا يعلموني
أيوة نسيوا يعلموني ان الوطن
تيجي لحظة عليه ويقسى
تيجي لحظة وكله ينسى
لما نكبر راح نعاني
ظلم يقتل بالثواني
بكرة ندفع التمن
أيوه نسيوا يعلموني ان الخسيس
راح يدوس وبكعب عالي
أي حد يكون خيالي
لو يفكر مرة يطلب
حقه أو فكر حيشطب
اسمه من قايمة جنابه
هما نسيوا يعلموني ان الحياة
هي أكبر مدرسة
وياريت ما دخلت المدرسة!!!!!!!!!
برنس
ردحذف