( الفلسفة السلبية )

( الفلسفة السلبية )

نزل يابني حبة وشوش نزل كمان طقمين نفاق
واضحك كده خليك بشوش خبي الدموع وسط الخناق
واوعاك تكون أبدا صريح
راح يكرهوك أو يحبسوك جوه الضريح
نزل يابني عشرين قناع
واهو كل واحد مننا يغير قناع
ماهو مش حينفع كل يوم نفس القناع!!!
مرة ابتسم من غير كلام
مرة تنام من غير سلام
وقناع أساسي من الخشب مابتقلعوش
وقناع ملون من دهب ما بتلبسوش
وقناع دموع وقناع يجوع
وقناع مالوش ابدا رجوع
من مرة واحدة بينكشف
ليه تتكسف؟!!!
نزل كمان حبة رتوش
لون قلوب الناس بلون
أما انت قلبك لونه ييجي ألف لون
خليك بعيد وبلاش تبيع
وبلاش تكون انت الشجيع
أحسن تشيل حبة مصايب للركب
وكمان تشيل حبة هموم ليها العجب
وعشان تكمل سكتك عيشها بدماغ
أو عيش كده من غير دماغ
قدم بلاغ
ضد اللي خانوا واللي كانوا بيكدبو
ضد اللي باعوا واللي ضاعوا وسبسبوا
قدم بلاغ
يمكن في يوم يتأدبوا
اما انت خليك يابطل
محمي ف قناعك ماتسيبوش
هات يابني من عندك وشوش
ماهو كله عالم من فاشوش
 واضحك كده خليك بشوش